Vetëm pak orë pasi Partizani zyrtarizoi se do ti luajë ndeshjet e Champions League në Arenën Kombëtare, erdhi konfirmimi se Tirana do të detyrohet të shtegtojë drejt qytetit të Elbasanit. Të kuqtë do të ndeshen me BATE Borisov më 11 korrik në kryeqytet, ndërsa ndeshja e bardhebluve ndaj Dinamo Batumi në Conference League do të zhvillohet në datën 13.
Edhe pse kishte 48 orë diferencë mes dy ndeshjeve, Tirana nuk arriti të gjente marrëveshjen që të luante në impiantin më të madh në vend. Ata vendosën që sfidën si pritës përballë kundërshtarëve gjeorgjianë ta luajnë në Elbasan Arena.
Problematika e stadiumeve me skuadrat shqiptare të angazhuara në kupat e Europës ka bërë që edhe Egnatia të kërkojë një fushë, e cila i plotëson kriteret për arenën ndërkombëtare. Edhe rrogozhinasit, që gjatë sezonit të kaluar fituan Kupën, do ta zhvillojnë në Elbasan ndeshjen si pritës në Conference League.
Fillimisht Egnatia luan në trasfertë kundër armenëve të Ararat, ndërsa takimi i kthimit në “shtëpi” është përcaktuar të zhvillohet në datën 20 korrik. I vetmi ekip që nuk ka dhimbje koke për stadiumin është Vllaznia.
Duke qenë se Loro Boriçi është një impiant i licencuar për ndeshjet e Kombëtares, Shkodranët nuk janë të detyruar të gjejnë një shtëpi tëre. Kuqeblutë do të jenë pritës përballë irlandezo-veriorëve të Linfield më 20 korrik, ku do të synojnë kalimin në turin e dytë të Conference League.
